Os datos da EPA relativos ao terceiro trimestre de 2019 reflicten en Galicia, contrariamente ao resto do Estado, un incremento do desemprego, que este é cada ve máis precario, unha alta porcentaxe de fogares con serias dificultades, brechas de xénero prexudiciais para as mulleres nos marcadores máis negativos e altos índices de paro estrutural que achegan a moitas persoas e ás súas familias a limiares próximos á pobreza ou exclusión social.

No terceiro trimestre do ano hai en Galicia un aumento da ocupación, pero de tan só o 0,63%, 6.900 máis, cunha evolución similar ao resto do Estado onde medra un 0,35%. Situándose as cifras de ocupación en 1.105.700 persoas, cunha taxa do 47,3%, aínda moi afastada dos valores superiores ao 50% previos á crise. No Estado a taxa xa supera este limiar, é do 50,5%.

En termos de desemprego, este aumenta en Galicia en 3.100 persoas (2,22%). No Estado, pola contra, diminúe nun 0,5%, en 16.200 persoas. No ano cae en ambos contextos, en Galicia nun 6,21%. Hai en Galicia, segundo os datos da EPA, 143.500 persoas en situación de desemprego e no Estado 3.214.400.

Isto conduce a unha taxa de paro nesta Comunidade do 11,5% e do 13,92% no Estado. Pero o que nun primeiro momento podería parecer unha diferenza positiva a favor desta Comunidade, só se produce por un menor dinamismo no mercado laboral, inmerso nun profundo cambio estrutural pola caída poboacional e, especialmente, da poboación activa.

66.200 persoas levan máis dun ano na procura de emprego, destes, 45.200 máis de dous

A cronificación do desemprego segue a preocupar moito a UGT-Galicia porque detrás desta danse situacións que achegan aos afectados e ás súas familias ao limiar da pobreza ou exclusión social. 66.200 persoas desempregadas levan máis dun ano na procura de emprego (56.700 considerados de longa duración). Pero é que destes, un total de 45.200 levan máis de dous anos.

A evolución das cifras reflicte, unha vez máis, un mercado laboral estacionalizado, fin temporada verán. Agora ben, de xeito estrutural constátase a perda de poboación activa, 200 persoas menos no ano, un síntoma da marcada atonía do mercado laboral galego.

50.100 vivendas con todos os activos no desemprego e 27.400 nas que non hai perceptores de ingresos

E todo isto conduce a fogares que o están pasando mal. Hai en Galicia 50.100 vivendas nas que todos os activos están no desemprego e 27.400 nas que non hai perceptores de ingresos. Valores insostibles, sobre todo, comparados cos que se rexistraban no terceiro trimestres de 2009 (44.800 e 19.700, respectivamente).

3,4 puntos de brecha na taxa de paro. As mulleres seguen a levarse a peor parte do desemprego

Por sexos, as mulleres seguen a ser as que se levan a peor parte do desemprego. A taxa de paro é do 11,5% pero é que no caso das mulleres sube ata o 13,3%, 3,4 puntos de diferenza. Entre os menores de 25 anos a taxa de paro é do 26,3%.

E as estatísticas que ofrece hoxe a EPA inciden aínda máis na precariedade do mercado laboral, consecuencia das nefastas reformas laborais impostas. A taxa de temporalidade volve a valores elevadísimos, do 27,4% (28,5% no caso das mulleres). Isto contrasta coa taxa de temporalidade que se rexistraba no 2013, do 24,4%.

Seguindo nesta análise da precariedade que impregna o mercado laboral galego, hai que dicir que das 243.800 persoas que teñen un contrato temporal, 2.200 teñen un contrato que tan só dura un día e 9.800 cun contrato de menos dun mes.

A taxa de parcialidade involuntaria é xa do 52,8%

Outra pata do mesmo banco é o emprego a tempo parcial que ocupa a 150.300 galegos, o 13,6% do total dos traballadores. Pero é que deste total, 79.300 persoas teñen esta modalidade contractual por non atopar un emprego a tempo completo. É dicir, a taxa de parcialidade involuntaria é xa do 52,8%.

Para UGT-Galicia, o novo Goberno que saia das urnas o día 10 debe marcarse unha tarefa prioritaria, derrogar as reformas laborais que tanta precariedade, temporalidade e parcialidade están traendo. Poñer enriba da mesa medidas que persigan a temporalidade inxustificada, o tempo parcial ficticio, os falsos autónomos, as horas extras non pagadas e as desigualdades no traballo.

Os orzamentos continuistas da Xunta en materia de emprego non poderán atender nin resolver os problemas estruturais desta Comunidade

O Goberno galego debería tomar nota dos datos que se rexistran en Galicia e non pode permitirse presentar un orzamento continuista en materia de políticas activas de emprego. Hai que deseñar e reforzar as políticas activas dende o público, así como, a mellora da protección das persoas, tendo como obxectivo a creación de emprego de calidade e con dereitos.

NOTA: O VOCEIRO DESTE TEMA É O SECRETARIO DE ORGANIZACIÓN E ADMINISTRACIÓN DE UGT-GALICIA, JOSÉ LUÍS FERNÁNDEZ CELIS. TELÉFONO: 638033482.

Fonte: Elaboración propia UGT Galicia a partir dos datos da EPA do IGE