UGT-Galicia advirte sobre a difícil situación das persoas desempregadas, xa que máis da metade perciben prestacións non contributivas

A reforma laboral está acabando coa precariedade no emprego

Santiago, 3 de novembro de 2022.- Os datos de paro e de afiliación á Seguridade Social do mes de outubro, publicados hoxe polo Servizo Público de Emprego (SEPE), reflicten un descenso do número de persoas desempregadas, confirmando o mellor dato deste mes en toda a serie histórica. Ademais, dita redución prodúcese nun mes onde habitualmente aumenta o paro, polo que a Reforma Laboral está a corrixir a alta volatilidade que caracteriza ao noso mercado laboral.

De feito, continúa a mellora na calidade do emprego, xa que os contratos indefinidos supuxeron un 35,24% do total de contratos asinados este mes. Así, a Unión Xeral de Traballadoras e Traballadores afirma que, a pesar do incerto e difícil contexto internacional, a reforma laboral segue xerando un impacto positivo no seu obxectivo de acabar coa precariedade laboral que predomina no noso país, aínda que queda moito camiño por facer, particularmente nas Administracións Públicas.

A pesar da positiva evolución xeral do emprego, UGT alerta de que a calidade de vida das familias traballadoras segue deteriorándose mes a mes, como resultado das elevadas taxas de inflación rexistradas e os escasos incrementos salariais asinados. En consecuencia, os salarios acumulan unha importante desvalorización do seu poder adquisitivo, provocando que as persoas traballadoras sexan novamente as principais vítimas dunha crise que non orixinaron.

Esta situación sería moi distinta se a patronal accedese a negociar un novo Acordo para o Emprego e a Negociación Colectiva (AENC) que, ademais de promover unha repartición máis equilibrada e xusta da crise inflacionista, outorgase maior confianza tanto ás empresas como á clase traballadora. Con todo, o sindicato considera que a actitude irresponsable da patronal conduciu a unha situación de bloqueo e incerteza máxima, o que levou a UGT a iniciar un proceso de mobilizacións, que hoxe vaise exemplificar cunha gran manifestación en Madrid, co obxectivo de reclamar subidas salariais acordes ao encarecemento da vida.

Ademais, UGT reclama a mellora no trámite parlamentario dunha Lei de Emprego insuficiente, que foi aprobada ás costas do diálogo social. Esta lei debe garantir unhas Políticas Activas de Emprego máis eficaces, que se axusten e adapten á realidade específica de cada persoa e logren unha rápida reinserción laboral para todas elas, combatendo especialmente o drama das persoas paradas de longa duración.

Datos desemprego Galicia

Baixando á análise concreta dos datos, estes indican que, do mesmo xeito que sucedeu no resto do Estado, en Galicia tamén se rexistrou o mellor dato da serie histórica, sendo o primeiro mes (outubro) dende 1996 no que cae o paro con respecto ao mes anterior. Así, cae o desemprego en Galicia nun 0,3%, con respecto a setembro, e un 0,92% no resto do Estado. No ano sucedeu o mesmo, a contracción foi do 6,7% en Galicia e do 10,51% no Estado. En ambos casos o comportamento do desemprego é mellor no Estado que en Galicia.

Entre os máis mozos, menores de 25 anos, o desemprego, sen embargo, tivo un peor comportamento. Medrou no mes nun 8,61%. Sen embargo, no ano rexistrou un mellor comportamento que no conxunto de idades, cunha caída máis forte, do 12,93%.

Por sexos, o paro subiu entre os homes nun 0,73%, fronte á contracción das mulleres, nun 0,97%. No ano a contracción foi do 6,84%% no caso das mulleres e do 6,51% no caso dos homes. Non obstante, en termos estruturais, as mulleres representan o 58,59% do total do desemprego en Galicia.

Mensualmente, o desemprego medrou tan só entre o colectivo denominado “sen emprego anterior”, nun 5,04%. Pola contra, rexistrouse unha diminución mensual do paro no resto dos sectores, do 0,81% nos servizos; 0,74% na construción; cae un 0,52% no sector primario; e un 0,21% na industria.

No ano a contracción é considerable en todos, rexístrase unha baixada do 8,35% na construción; no primario, do 12,73%; do 5,68% nos servizos; do 12,28% na industria; e do 3,9% entre o colectivo de “sen emprego anterior”.

Territorialmente, a evolución no mes foi desigual. Caeu o paro na Coruña, 0,57%, e en Pontevedra, o 0,22%. Pola contra, aumentou o 0,2% en Lugo e o 0,19% en Ourense. Interanualmente, rexistrouse diminución do paro en todos os territorios. A caída máis contundente foi na Coruña, do 7,57%, e en Pontevedra, do 6,83%. En Lugo baixou o 5,54% e o 4,17% en Ourense.

Como xa se apuntaba en parágrafos precedentes, un mes máis, dende a aprobación da reforma laboral, dáse un excelente dato de contratación indefinida, do 35,24%, aínda que por debaixo do resto do Estado onde esta chega ao 45,8%. Realízanse menos contratos, 69.958, que no ano anterior pero de moita máis calidade.

Por sectores, destaca a porcentaxe de contratación indefinida na construción, do 72,1%; do 63,87% no primario; do 34,6% nos servizos; e do 23,7% na industria.

En canto ás cifras de afiliación á Seguridade Social, en Galicia a media mensual é de 1.048.700, baixando nun 0,06%, mentres que no Estado aumenta nun 0,51%.

A taxa de cobertura por desemprego sitúase no 60,31%, con 80.063 persoas beneficiarias de prestacións. Non obstante, hai que salientar que, deste total, unha alta porcentaxe son subsidios, 39.164 corresponden coa renda activa de inserción e 4.589 son importes asistenciais. Tan só o 45,4% son prestacións de carácter contributivo. Isto evidencia as dificultades que están a atravesar moitas persoas pola baixa contía das prestacións que están a percibir nunha contorna de prezos desbocados.

Cifras Record de conversións, récord de contratos indefinidos.

Evolución % contratación indefinida (iniciais e conversións)