UGT-Galicia demanda a derrogación da reforma laboral e o aumento do SMI, que afecta especialmente a este colectivo

A pandemia agrava aínda máis a situación das mulleres no eido laboral

Representan xa case o 60% do desemprego en Galicia e tamén o 60% dos ERTE. De feito, no mes o paro baixa entre os homes pero sobe entre as mulleres

Santiago, 2 de marzo de 2021.- Os datos de paro feitos públicos hoxe reflicten que a pandemia está a agravar en xeral a situación económica e laboral de todo o país pero, no caso das mulleres, vense aínda máis prexudicadas, representando xa case o 60% do total do desemprego en Galicia e o 60% do total dos ERTE en vigor.

Resulta evidente que o paro volve a constatar os efectos perniciosos da pandemia sobre a actividade económica e emprego, polo que é necesario poñer todos os medios para acelerar o proceso de vacinación; seguir mantendo os ERTE (que afectan a 47.207 persoas (media mensual de febreiro). Por sexos, utilizando os datos do último día do mes, xa que non se ofrecen datos de media mensual por xénero, hai 19.012 homes e 27.653 mulleres. Representando así a muller, nada menos que o 59,3% do total de traballadores afectados por ERTE. E tamén urxe reforzar o actual escudo de protección social.

Para UGT-Galicia, a mellor noticia para o 8 de marzo, Día internacional da muller, sería que o Goberno cumpra os seus compromisos e derrogue a reforma laboral de 2012 porque a recuperación non pode asentarse na precariedade, temporalidade e parcialidade dos contratos, que afectan sobre todo ás mulleres e ós máis mozos.

Ademais, é preciso que suba o SMI, ata os 1.000 euros ó mes en 2021, unha cuestión de xustiza social que impulsará a actividade e contribuirá a loitar contra a brecha salarial, pois son as mulleres as que teñen salarios máis baixos.

UGT insta tamén a impulsar o desenvolvemento de políticas activas de emprego eficaces que faciliten o cambio de modelo produtivo cara unha economía verde, dixital e baseada nunha industria forte, sostible e con empregos estables.

Afondando máis nos datos publicados hoxe polo Ministerio de Traballo e Economía Social e polo Ministerio de Inclusión, Seguridade Social e Migracións compróbase que se está lonxe de mitigar a desfavorable evolución provocada pola crise sanitaria da COVID-19 no emprego e na economía en xeral.

Sitúase a cifra de desemprego en Galicia no mes de febreiro de 2021 en 185.228, cae con respecto ao mes anterior en 756, 0,41%. En termos interanuais o desemprego aumenta en 18.999 persoas, o 11,43% máis en Galicia, e 762.742 parados máis no Estado. As cifras falan por si mesmas, 185.228 desempregados en Galicia e máis de 4 millóns, 4.008.789, no Estado.

O incremento interanual do paro sitúase en termos similares á crise anterior, rompéndose a recuperación que se estaba dando dende o ano 2014

O aumento en Galicia en termos interanuais, como se comproba no cadro de evolución seguinte, sitúase nos volumes de crecemento da crise anterior, rómpese a tendencia de caída interanual pola recuperación que había dende 2014.

Por idades, son 8.439 os mozos e mozas menores de 25 anos os que están en situación de desemprego, caendo no mes o paro, o 1.6%, pero medrando o 7,5% no ano.

Se se consideran os menores de 30 anos dun total de 25.151 persoas desempregadas no mes, hai 11.665 homes e 13.486 mulleres. A muller segue, sexa cal sexa a súa idade, a ter maior peso nas cifras de desemprego con respecto aos homes, neste caso o 53,6% do total.

A evolución de caída do desemprego no mes foi no caso dos homes do 1,6%, fronte ao incremento nas mulleres do 0,5%. No ano afecta tanto aos homes, 11,5% de aumento de desemprego, como ás mulleres, co aumento do 11,6%.

En termos estruturais, as mulleres seguen a representar nada menos que o 57,1% do total de desemprego en Galicia, afecta a un total de 105.808 mulleres en Galicia, fronte a 79.420 homes. 26.388 mulleres desempregadas máis.

No mes, ao analizar por sector de actividade, hai unha caída no primario, 2.8%, na construción, 3.15% de contracción, e no colectivo SEA, o 3.8% de baixada. Polo contrario, medra na industria, o 0.8%, e nos servizos, o 0.21%.

No ano, todos os sectores aparecen prexudicados, destacando os servizos, co 14% máis, tamén o primario, con 11,1% máis, considerable aumento tamén en industria e Sen emprego anterior, con 9,5% e 3% de aumento, respectivamente, e no que menos aumento se rexistra é na construción, cun 1,5% de crecemento.

En termos absolutos o desemprego ten maior incidencia nos servizos, 15.998 desempregados máis no ano, 14% máis nun ano. Xa só as cifras de desemprego nos servizos son preocupantes, 130.985; na industria, nada menos que 20.038; na construción, 13.810; no colectivo SEA, 13.695; e no primario 6.700.

En termos provinciais, todas teñen a mesma evolución, caída no mes e medra no ano en todas as provincias. Na que máis cae no mes en termos absolutos é Ourense, 285 menos, e tamén en relativos, o -1,4%. No ano, fortes crecementos en todas, nas que máis: 14,6% en Lugo, 12,1% en Coruña, 11,4% en Ourense e 9,9% en Pontevedra.

Por provincias

En febreiro de hai un ano realizábase 23.000 contratos máis en Galicia

Cos datos de febreiro compróbase que tan só se realizaron 49.174 contratos, cifra mínima, contraéndose con contundencia con respecto ás cifras prepandemia. En febreiro do ano 2020 realizáronse 23.258 contratos máis.

Se nun ano cae a contratación temporal en 21.235 contratos, danos unha idea de que nin a contratación temporal estase utilizando.

Por outra banda, a taxa de cobertura en xaneiro 2021 (último dato dispoñible) sitúase nun 69,3% (64,02% no Estado). As persoas beneficiarias de prestacións de desemprego sitúanse en 119.037. Destas, hai un considerable número de persoas beneficiarias de prestación contributiva, 60.621, o 51%. Isto indica que hai unha considerable perda de empregos que estaban cotizando, e cotizando por desemprego, non constan aqueles que non tiveran cotización por desemprego.

Hai en Galicia máis de 18.000 afiliados cotizantes menos que hai un ano

Pésima evolución nas cifras de afiliación á Seguridade Social (media mensual), sitúase en Galicia no mes en 994.029. Medra no mes só no 0,17% e contracción no ano de 1,8%, 18.324 afiliados cotizantes menos.