Os datos do desemprego do mes de abril, feitos públicos hoxe, reflicten unha tímida mellora que ten un marcado carácter estacional polo comezo da temporada turística. Ademais, aínda que baixa o paro tamén en Galicia o fai en menor medida que no resto do Estado. Isto hai que acompañalo de altos índices de temporalidade, parcialidade involuntaria e alta rotación na contratación que non se consolida. En definitiva, uns datos que apuntan a que as políticas do PP, tanto no Estado como en Galicia, empobrecen a calidade do emprego, a calidade de vida das persoas e, polo tanto, á clase traballadora e á sociedade no seu conxunto.

Os datos concretos apuntan a unha caída de 3.644 persoas desempregadas en Galicia no mes de abril, o que supón unha baixada do 1,57 por cento con respecto ao mes anterior. Así, o mes remata con 228.153 persoas desempregadas nesta Comunidade. No resto do Estado a baixada do desemprego foi maior, do 2,04 por cento.

En relación ao ano anterior, o desemprego baixou nun 6,8 por cento en Galicia e un 7,43 por cento no Estado.

CONTRACCIÓN DA POBOACIÓN EN IDADE DE TRABALLAR

Un mes máis, constátase contracción na poboación en idade de traballar, basicamente, pola saída da poboación cara fóra e o retorno de inmigrantes cara os seus países de orixe. De feito, segue a caída do desemprego entre as persoas estranxeiras, dun 4,2 por cento.

Por sexos, no mes cae o desemprego máis entre os homes, nun 2,23 por cento, que nas mulleres, nun 1,01 por cento. Así, as mulleres acadan o 54,2 por cento do total do desemprego en Galicia. En termos interanuais o desemprego cae en ambos sexos pero os máis beneficiados tamén son os homes, contraendo as cifras do paro nun 8,25 por cento, fronte á menor caída das mulleres, dun 5,51 por cento.

Por provincias, o paro baixa en todas, un 1,83 por cento en A Coruña, un 1,55 por cento en Pontevedra, un 1,51 por cento en Lugo e un 0,81 por cento en Ourense. En relación a hai un ano tamén baixa en todas as provincias.

Por idades, entre os máis mozos, os menores de 25 anos, no mes o paro cae dun xeito similar a como o fai no resto das idades. Sen embargo, interanualmente, a caída é máis acusada, do 11,16 por cento. A razón desta forte caída está na saída de efectivos da Comunidade galega e a falta de relevo xeracional.

En canto aos sectores, o paro baixa en todos, salvo no de sen emprego anterior no que sube un 0,21 por cento.

Os datos de contratación apuntan a un incremento do 0,86 por cento, fronte ao 2,18 por cento que se rexistra no resto do Estado. Caen no mes os contratos indefinidos, nun 4,63 por cento, e medran os temporais, un 1,41 por cento.

A porcentaxe de contratos indefinidos sobre o total no mes de abril é do 8,67 por cento. En Galicia fixéronse 67.941 contratos en tan só un mes, o que evidencia a precariedade destes contratos que non se consolidan e os altos niveis de rotación laboral.

CRONIFICACIÓN DO PARO DE LONGA DURACIÓN E BAIXOS NIVEIS DE COBERTURA

A UGT-Galicia preocúpalle moito a cronificación do paro de longa duración e os baixos niveis de cobertura por desemprego. A cifra de beneficiarios con prestación en Galicia é de 108.721 persoas. O carácter contributivo desta prestación está en mínimos, tan só 43.399 persoas son beneficiarias da prestación contributiva, o 40 por cento do total. A taxa de cobertura é do 50,99 por cento (53,3 por cento no resto do Estado), acadando mínimos. A prestación por desemprego xa é de carácter asistencial. A contía media mensual da prestación de carácter contributivo é de 779,7 euros ao mes, fronte aos 804,5 no Estado. Pero é que as contías medias das prestacións asistenciais son de 426 euros.

A día de hoxe hai en Galicia 123.076 parados sen ningún tipo de cobertura, o 54 por cento dos desempregados. Isto orixina serios riscos de traspasar as liñas da exclusión social e pobreza.

A media de afiliados á Seguridade Social é de 943.356. Cifra afastada do millón de afiliados de antes da crise.

Este mercado laboral, fortemente deteriorado, onde predomina o emprego temporal, precario e a tempo parcial involuntario, cunha elevada rotación no emprego e baixos salarios, indica que urxe acometer catro grandes reformas: un plan de choque polo emprego; a ampliación da cobertura aos desempregados, entre outras medidas, ampliando o acceso ao Programa de Activación polo Emprego; reactivar o contrato de relevo para facilitar o emprego dos mozos, ao tempo que se asegura a cobertura aos desempregados maiores de 55 anos; e unha estratexia estatal industrial que aposte pola industrialización do tecido produtivo.

Estas reformas son, para UGT-Galicia, ineludibles e urxentes para lograr unha recuperación económica en España sostible, duradeira e para toda a sociedade.

NOTA: O VOCEIRO DESTE TEMA É O SECRETARIO DE POLÍTICA SINDICAL, RELACIÓNS LABORAIS E FORMACIÓN DE UGT-GALICIA, JOSÉ DOMINGO BARROS. TELÉFONO: 679451570.