UGT-Galicia alerta que, a pesar da boa evolución do emprego, no Estado e na nosa Comunidade, non se pode baixar a garda. Reclama políticas máis eficaces contra o paro de longa duración e reafirma a súa estratexia de mobilización para esixir aos patronal incrementos salariais xustos e cláusulas de revisión salarial nos convenios colectivos. Trátase de frear a perda de poder adquisitivo das persoas traballadoras. Así mesmo, esixe ao Goberno que aprobe xa o incremento do SMI, que debe chegar aos 1.100 euros ao mes para aliviar ás traballadoras/é que menos gañan.

 

Os datos de paro na nosa Comunidade no mes de decembro, ademais da lóxica mellora polas contratacións de Nadal, amosa unha mellora clara do mercado laboral, efecto directo das reformas laborais introducidas. Así, hai 10.362 persoas desempregadas menos que hai un ano en Galicia e no Estado descende en 43.727 persoas e sitúase en 2.837.653 persoas desempregadas rexistradas nos Servizos Públicos de Emprego, a cifra máis baixa dende 2007.

 

En Galicia o paro baixa en 536 persoas en decembro até os 142.222, sendo o dato da serie histórica nun mes de decembro máis baixo dende 1996 e tamén a cifra máis baixa dende xullo de 2007.

 

Cos datos publicados hoxe polo Ministerio de Trabajo y Economía Social e polo Ministerio de Inclusión, Seguridad Social y Migraciones compróbase unha caída do desemprego tanto con respecto ao mes anterior como con respecto ao mesmo mes do ano anterior.

Constatase tamén un récord na contratación indefinida nun mes de decembro, o 29.32 por cento total de contratación (Pero aínda dez puntos máis baixa que no Estado, onde acada o 39 por cento da contratación). É preciso lembrar que hai un ano, en decembro de 2021, a porcentaxe de contratación indefinida era do 9,46%

 

Sitúase o dato de desemprego rexistrado en 142.222 persoas e no Estado en 2.837.653 persoas. É unha caída dun 0.38 por cento (563 persoas desempregadas menos) con respecto a novembro e do 6.79 por cento con respecto a hai un ano (10.362 persoas desempregadas menos.). No estado a contracción é aínda máis acusada no mes cun 1.52 por cento menos e no ano cun 8.64% de diminución.

 

 

Son 5.531 os mozos e mozas menores de 25 anos en desemprego, cunha contracción no mes dun 7.24 por cento e do 8.94 por cento no ano. Contraccións que son moito máis acusadas en ambos períodos que no conxunto de idades.

 

Por sexos, hai unha evolución desfavorable no mes do desemprego para os homes, nos que se elevan as cifras nun 0,65 por cento (polo aumento do desemprego na construción e na industria, sectores tradicionalmente máis masculinizados) e contraria evolución no caso das mulleres, xa que hai unha contracción no número de mulleres desempregadas dun 1,11%.

 

No conxunto do ano, hai unha clara contracción en ambos sexos, máis acusada no caso nos homes, cunha diminución do 7.56 por cento e do 6.22 por cento para as mulleres.

En termos estruturais as mulleres seguen a representar nada menos que o 57.92 por cento do total de desemprego en Galicia. O paro afecta na nosa comunidade a un total de 82.374 mulleres fronte a 59.848 homes.

 

 

No mes, ao analizar por sector de actividade, hai un aumento considerable no sector da Construción, nun 3.45%, no de Industria, o 2.15 por cento, e no Primario cun 0.92 por cento de aumento. Pola contra, hai unha caída do 0.94 por cento nos Servizos e do 2.38 por cento no colectivo Sen Emprego Anterior. Tradicionalmente, as festas de  Nadal xeran emprego nos Servizos e incorporación do colectivo SEA (mocidade).

 

No ano, constátase unha caída do 16,03 por cento no Primario, na Industria do 11.5%, na Construción do 9.94%, nos Servizos do 5.83 por cento e no colectivo SEA do 1.15%.

 

 

En termos provinciais hai unha similar evolución no mes, salvo no caso de A Coruña na que, practicamente, se manteñen as cifras. É de sinalar unha contracción do 0.92 por cento en Ourense, do 0.54 por cento en Pontevedra e do 0.50 por cento en Lugo.

Nos datos relativos ao ano, a contracción é xeralizada. As caídas máis contundentes son en Pontevedra, cun descenso do 8.21% e en A Coruña cun 6.2%. No caso de Lugo a diminución é dun 6.17 por cento e a de menor caída é a provincia de Ourense, cun descenso do 4.41%.

 

 

Os datos reflicten unha espectacular  mellora da contratación indefinida, chegando á 29.32% sobre o total de contratacións, sendo unha porcentaxe histórica nun mes de decembro. É aínda mellor no conxunto do Estado, onde chega a ser do 39%.

Cos datos de decembro compróbase que en Galicia se realizaron 52.044 contratos. Realízanse menos contratos que no ano anterior pero de moita mellor calidade, tal e como se comproba na táboa seguinte: