Dende o 28 de novembro ao 31 de decembro as mulleres traballan gratis

Santiago, 28 de novembro de 2025.- UGT-Galicia denuncia que dende hoxe, 28 de novembro, ata o 31 de decembro as mulleres deste país traballan gratis, segundo os datos de Eurostat. Esta fonte indica que no conxunto da UE por cada euro que gaña un home, a muller ingresa 88 céntimos. En España está situación é mellor, por cada euro que gaña un home a muller ingresa 90,8 céntimos.

Tendo en conta os últimos datos publicados por EUROSTAT 2025, referidos ao ano 2023, na UE as mulleres cobran (salario/hora) un 12% menos que os homes de media. 43,8 días de salario ao ano. Por este motivo, a Comisión Europea celebrou o Día da igualdade salarial o 17 de novembro. En España, con esta mesma fonte, a porcentaxe baixa ao 9,2%, o que supón 33,58 días ao ano que traballan gratis as mulleres, dende o 28 de novembro.

Dende 2010 ata 2023 na UE a diferenza salarial media baixou en 3,8 puntos. En España a baixada foi de 7 puntos.

Por países, os casos máis extremos de diferenzas son Luxemburgo (-0,9), é dicir, os salarios das mulleres son máis elevados que os dos homes. No outro extremo está Letonia, cunha diferenza do 19%.

Por idades, a tendencia na UE é que as diferenzas son menores en idades inferiores. Patrón que se repite tamén en España. A brecha para os menores de 25 é de 0,4 puntos; entre os 35 e 44 anos é de 8,7 puntos; de 12,6 entre os 55-64; e o máximo está nos maiores de 65, con 33,3 puntos. Esta tendencia pode apuntar, entre outras variables, á penalización das interrupcións da carreira laboral.

Interrupción da carreira laboral, sobrecarga por coidados e segregación horizontal e vertical

Non obstante, dende UGT-Galicia considérase que, ademais nas interrupucións da carreira laboral e a sobrecarga de coidados para as mulleres, neste país a persistente segregación horizontal e vertical e a infravaloración do traballo feminino e a súa maior precariedade tamén xogan un papel importante.

En termos globais, España sitúase no 11º lugar na Europa dos 27 coas brechas salariais máis baixas. Dende UGT considérase que isto é grazas ás políticas que nestes últimos anos se están a desenvolver en materia de igualdade, sucesivas subidas do SMI, o Real Decreto de medidas urxentes para a garantía de igualdade de trato e oportunidades entre mulleres e homes no emprego e a ocupación, que introducía a definición de salario de igual valor no ET, ademais da obrigatoriedade dos rexistros salariais desagregados por sexo. Norma que foi desenvolta en materia retributiva polo Real Decreto de Igualdade retributiva de 2020, co desenvolvemento dos rexistros salariais, valoración de postos con perspectiva de xénero e as auditorías retributivas, un elemento esencial dos plans de igualdade.

A nivel europeo o gran avance foi a aprobacón da Directiva 2023/970 do Parlamento Europeo e do Consello do 10 de maio de 2023 pola que se reforza a aplicación do principio de igualdade de retribución entre homes e mulleres por un mesmo traballo a través de medidas de transparencia retributiva e de mecanismos para o seu cumprimento.

Agora tócalle a España trasladar esta normativa á lexislación, ten de prazo ata o 7 de xuño de 2026 e UGT agarda que esta directiva sexa trasladada á nosa normativa interna en prazo.

UGT recoñece que dende o 2020 a Comisión Europea logrou avances significativos en materia de políticas de igualdade de xénero.

INFORME