Centos de delegados da área pública de UGT e CCOO concéntranse diante do Parlamento de Galicia para denunciar a ausencia de negociación da Xunta e demandar a recuperación dos dereitos roubados

No contexto do calendario de mobilizacións posto en marcha por UGT e CCOO, que se desenvolverá baixo o lema “Servizos públicos. Recuperación de dereitos roubados”, centos de delegados da área pública de ambos sindicatos concentráronse hoxe pola mañá diante do Parlamento galego en defensa do dereito a negociación colectiva e recuperación de dereitos roubados que afecta a ensino, sanidade e Administración autonómica.

Segundo a Xunta de Galicia, este sería o ano da recuperación, tras máis de oito anos de recortes de dereitos, rebaixas salariais, destrución de emprego, privatización de servizos e sacrificios sen fin. O certo é que os Orzamentos autonómicos para 2017 son máis do mesmo.

A Lei 1/2012, de medidas temporais, prorrogada nas sucesivas leis de orzamentos, contemplaba que a súa aplicación decaería coa mellora da situación económica de Galicia. En 2016 os datos publicitados pola Xunta confirman a mellora, polo que é obrigado devolver ás empregadas e empregados públicos os “dereitos roubados”.

A Xunta de Galicia convocou una Mesa xeral como mera formalidade que vulnera o dereito a negociación colectiva, procedendo UGT e CCOO a presentar recurso solicitando que se declare a convocatoria contraria a dereito, que se anule e se indemnice na contía dun euro ás organizacións sindicais.

O proxecto de orzamentos para o ano 2017 non contempla a recuperación de dereitos, nin incremento salarial, nin supresión de taxas de reposición e, ademais, acompáñanse dun proxecto de Lei de medidas de contrarreforma da Lei do emprego público de Galicia que nalgúns casos vulneran pactos e acordos coas organización sindicais.

CCOO e UGT demandan que os Orzamentos de 2017 habiliten un proceso de negociación para a recuperación de dereitos roubados:

  • Eliminación da taxa de reposición.

  • Ofertas excepcionais de emprego en sanidade, ensino, Administración xeral e laborais.

  • Recuperación real e efectiva do poder adquisitivo.

  • Aplicación do V Convenio Colectivo Único do Persoal Laboral da Xunta de Galicia, na súa totalidade.

  • Concursos de traslados, de xeito sistemático e continuo, en toda a Administración autonómica.

  • Recuperación de pactos e acordos suspendidos.

  • Recuperación de dereitos suspendidos (IT, acción social, dereitos sindiciais…).

  • Estudo e tratamento da repercusión das sentenzas do TXUE sobre o traballo de duración determinada e a aplicación das mesmas.

Isto foi o que centos de delegados da área pública de UGT e CCOO demandaron hoxe na concentración que protagonizaron diante do Pazo do Hórreo en Santiado.

Pero é que a campaña de mobilizacións continuará e, se é necesario, intensificarase. De momento o día 31 están convocadas concentracións diante das sedes provinciais da Xunta; o día 1 de febreiro tamén está prevista unha concentración na explanada do Sergas; e o 6 de febreiro de novo será o Parlamento galega onde se concentrarán os delegados de CCOO e UGT.



 

EN DEFENSA DA NEGOCIACIÓN COLECTIVA



 

POLA RECUPERACIÓN DE DEREITOS, EMPREGO E SALARIOS