Nun ano 20.000 empregos temporais menos en Galicia. As reformas laborais configuraron un mercado de traballo no que destruír o emprego temporal é o máis doado

Agora toca derrogar as reformas laborais e crear emprego decente e con dereitos

UGT-Galicia reitera a falta de dinamismo do mercado laboral galego. No último ano 21.700 persoas pasan á inactividade nesta Comunidade

Santiago, 29 de abril de 2021.- Para UGT-Galicia, os datos da EPA feitos públicos hoxe reflicten, claramente, os efectos da pandemia e, no caso concreto de Galicia, o pouco dinamismo do seu mercado laboral.

Así, nesta Comunidade, tanto en termos trimestrais como interanuais, rexístrase unha evolución moi negativa da actividade e da ocupación, cun aumento do desemprego e da inactividade. De feito, o efecto desánimo na busca de emprego e a falta de expectativas, leva a que a variable que máis se incrementa en Galicia sexa a inactividade.

Tras o Nadal, no primeiro trimestre de 2021, segundo os datos da EPA, a ocupación cae en 21.100 persoas e o paro sube en 15.700.

Pero que en termos interanuais, os efectos da pandemia son máis evidentes aínda. Caen os activos en 21.700, subindo así a inactividade en Galicia nun total de 24.400 persoas.

Interanualmente, o paro medra en 1.500 persoas, un 1%, unha porcentaxe moito máis baixa que no resto do Estado, precisamente, por esa saída de 21.700 galegos cara a inactividade.

De feito, os ocupados no trimestre caen en Galicia un 2%, fronte ó 0,7% do resto do Estado.

As taxas de paro quedan no 13% en Galicia (158.300 parados) e no Estado no 15,98% (3.653.900 persoas desempregadas).

De novo, a maior tendencia á actividade no resto do Estado explica tamén unha taxa de paro máis elevada que en Galicia. O paro medra no ano no Estado no 10,3% e en Galicia o 1%. Reflexo da tendencia á inactividade, falta de expectativas e menor dinamismo do mercado laboral galego.

A taxa de paro entre as mulleres e máis de dous puntos superior á dos homes e no caso dos máis mozos escala ata o 38%

As mulleres e os máis mozos, menores de 25 anos, lévanse, de novo, a peor parte do mercado laboral galego. A taxa de paro entre os homes é dun 11,8% e no caso das mulleres sube ata o 14,3%. No caso dos máis mozos escala ata o 38%. As grandes debilidades do mercado laboral galego seguen a ser as mulleres e os máis mozos.

23.200 empregos perdidos nun ano, dos que 22.400 foron na industria

Interanualmente, a perda de emprego é moi elevada. 23.200 empregos perdidos. En todos os sectores, pero 22.400 na industria, un 11,7% de caída. Na construción, 6.200, baixada do 8,1%; no primario, 1.700 (2,5% menos); e tan só medra no sector servizos, con 7.000 emprego máis, un 0,9%.

No trimestre, a perda do emprego, tras o Nadal, tamén foi xeneralizada. 5.300 menos na construción, unha caída do 7%; 4.400 no primario, 6,2%; 5.800 na industria, 3,3%; e 5.600 no sector servizos, un 0,7% menos.

Hai en Galicia 851.800 persoas asalariadas, diminuíndo no primeiro trimestre, con respecto ó anterior, en 19.900. No ano a caída foi de 20.300 persoas asalariadas.

UGT-Galicia denuncia o fácil que resulta expulsar o emprego temporal do mercado laboral galegos, polas reformas impostas

A taxa de temporalidade mantense en case a cuarta parte da poboación asalariada, no 23,3%. Cae no trimestre, o que amosa o fácil que resulta expulsar o emprego temporal do mercado laboral, sobre todo, tras as reformas laborais impostas. Nun ano, 20.000 empregos asalariados con contratos temporal menos, fronte a preto de 300 no caso do indefinido.

Pero é que dos 20.000 empregos perdidos, 12.500 afectaron a mulleres con contrato temporal. Ante unha crise de emprego como a que se está a vivir, o temporal e o feminino, os máis afectados.

Fonte: Elaboración propia UGT Galicia a partir dos datos da EPA do IGE

Chegou o momento de aplicar medidas que recuperen os dereitos perdidos. O aumento do SMI, derrogación da reforma laboral e reforzo das políticas activas de emprego

Para UGT-Galicia, é o momento de aplicar medidas que recuperen os dereitos laborais perdidos, avanzando na axenda política aínda pendente. O aumento do SMI e a derrogación da reforma laboral, así como o reforzo inmediato das políticas activas de emprego, deberán ser obxecto de atención canto antes. Sen estas decisións aínda por adoptar, os investimentos proxectados no marco do Plan de Recuperación, Transformación e Resiliencia, non chegarán ós que máis as precisan.