​ A firma do acordo coa Xunta e o preacordo asinado onte coa patronal ratifica o compromiso serio de UGT e o avance das melloras sociais no transporte de viaxeiros por estrada en Galicia​

Onte, día 12, pechouse un preacordo coa patronal do transporte de viaxeiros por estrada de Galicia, ratificado hoxe polos traballadores nas distintas asembleas celebradas esta mañá.

O acordo, -obtido coa intermediación do Consello Galego de Relacións Laborais previa solicitude das tres centrais sindicais e subscrito polos responsables de UGT na mesa, Miguel Angel Reboiras Casais e Beatriz Meilán do Río-, supón o desbloqueo dun conflito que suscitou unha folga iniciada o pasado día 20 de xuño.

Dúas eran as reivindicacións: a negociación dos convenios do sector por parte da patronal nas catro provincias galegas e asegurar as garantías de emprego para os traballadores do sector no plan de transporte de viaxeiros da Xunta.

A retirada do Plan da Xunta demostrouse insalvable, o Goberno de Galicia decidiu seguir adiante con el, a pesar das duras críticas suscitadas polo mesmo en todos os ámbitos, tras a publicación no DOG o pasado 7 de xullo co que supoñía o inicio dos prazos administrativos necesarios para a final concesión das liñas afectadas. UGT non o apoiou por considerar que non dota das solucións que necesita Galicia para articular o transporte de viaxeiros na nosa Comunidade pero, ademais, e, sobre todo, porque supoñía un grave risco para o mantemento do emprego e as súas condicións de traballo no sector.

Para paliar isto, o 10 de xullo UGT asinou xunto con CCOO e sen o apoio da CIG un acordo coa Consellería de Infraestuturas e Vivenda que blinda a subrogación dos traballadores afectados e as súas condicións laborais, que ademais incorpora cláusulas con melloras sociais nos pregos do Plan que supoñen practicamente o cento por cento do solicitado polos traballadores.

Por outra banda, o acordo subscrito onte coas federacións de transporte e as tres centrais sindicais supón a apertura da negociación para a revisión das táboas salariais para os catro convenios colectivos galegos, partindo dun mínimo do 2% a partir de hoxe. Desenvolveranse as negociacións en comisións provinciais que se reunirán semanalmente, concluíndose eses avances nunha reunión da Mesa galega coa mesma periodicidade, que será a encargada de ratificar e impulsar os mesmos, reservándose a capacidade de reactivar a folga no caso de que ditas negociacións non alcancen as reivindicacións dos traballadores para esta materia.

Os acordos asinados por UGT non só posibilitan o desbloqueo do conflito que tiña sumida a Galicia nun caos, por afectar a un sector vital tanto para a convivencia social como para o desenvolvemento e avance económico da nosa Comunidade. Posibilita, ademais, un escenario máis favorable para afrontar o reto de negociacións futuras de cara ao que supoñerá a implantación do futuro Plan Xeral de Mobilidade de Galicia para o 2019, tanto para o Goberno como para as empresas e traballadores.