Ante a situación de excepcionalidade xerada polo apagamento eléctrico que afecta a todo o país, desde a Unión Xeral de Traballadoras e Traballadores (UGT) informamos que, de acordo con o establecido no artigo 37.3.g) do Estatuto dos Traballadores, as persoas traballadoras que se vexan imposibilitadas de acudir ao seu posto de traballo estarán en situación de permiso retribuído.

A redacción vixente do devandito artigo, introducida polo apartado un da disposición final segunda da Real Decreto-lei 8/2024, do 28 de novembro, establece:

"Ata catro días por imposibilidade de acceder ao centro de traballo ou transitar polas vías de circulación necesarias para acudir ao mesmo, como consecuencia das recomendacións, limitacións ou prohibicións ao desprazamento establecidas polas autoridades competentes, así como cando concorra unha situación de risco grave e inminente, incluídas as derivadas dunha catástrofe ou fenómeno meteorolóxico adverso. Transcorridos os catro días, o permiso prolongarase ata que desaparezan as circunstancias que o xustificaron, sen prexuízo da posibilidade da empresa de aplicar unha suspensión do contrato de traballo ou unha redución de xornada derivada de forza maior nos termos previstos no artigo 47.6. Cando a natureza da prestación laboral sexa compatible co traballo a distancia e o estado das redes de comunicación permita o seu desenvolvemento, a empresa poderá establecelo, observando o resto das obrigacións formais e materiais recollidas na Lei 10/2021, do 9 de xullo, de traballo a distancia, e, en particular, a subministración de medios, equipos e ferramentas adecuados".

Por tanto, todas as persoas traballadoras afectadas que non poidan acudir ao seu centro de traballo debido ao apagamento teñen dereito a un permiso retribuído conforme a esta regulación, sen prexuízo de que, se é posible tecnicamente e de mutuo acordo, poidan prestar servizos mediante teletraballo nas condicións legalmente establecidas.

Desde UGT esiximos o pleno respecto aos dereitos laborais e apelamos á responsabilidade empresarial nun momento de evidente forza maior que debe ser xestionado con sensibilidade e conforme á legalidade vixente.

UGT continuará velando pola protección dos dereitos das traballadoras e traballadores nesta situación extraordinaria.